လွတ်လပ်မှု၊ ချစ်ကြည်မှု၊ ငြိမ်းချမ်းမှုနှင့် လူသားဆန်မှု အနုပညာ (FREEDOM, LOVE, PEACE AND ART OF HUMANITY)

မြူခိုးဝေဝေ သစ္စာသစ်တရား၊ အာဟာရမှုန့်နှင့် အာကင်ဆောရောက် မင်းထွဋ်ခေါင်သို့ လွမ်းချင်းကဗျာ- ခင်လွန်း

“ တောင်ခိုးတဲ့ဝေဝေ၊ မြူခြေတဲ့ဆိုင်းဆိုင်း

  ငါ့အဖေမော်ကာကြည့်တယ် ခေါင်းပေါင်းပြုတ်ကျ ” တဲ့။

ကျနော်တို့နေတဲ့ ဒုက္ခသည်စခန်းလေးတခွင်မှာ ခုနေဆိုရင် နှင်းလားမြူလားမကွဲပြားအောင် ရှစ်ခွင်တိုင်းမှိုင်းမှိုင်းမှုန်ရီနေပါပြီ။ ဒီလိုအချိန်မျိုး မှာ ငယ်ငယ်တုန်းက ကဗျာရူးစာရူးဘဝမှာ ကာရန်အမြီးအမောက်မတည့်တဲ့ကဗျာလေးတပုဒ် ကြားခဲ့ဖူးတာကို ပြန်သတိရလာတတ်ပြီး ကဗျာ အကြောင်းလေး ပြောချင်လာမိပါတယ်။ ကဗျာဆိုတာ အလှဗေဒ ရသဂုဏ်မြောက်၊ အဖွဲ့အနွဲ့အဆင်တန်ဆာတို့နဲ့ ခံစားသီကုံးရေးစပ်ကြရတာမျိုးလို့ ခပ်ကြမ်းကြမ်းလေးဆိုလို့ရမလားခင်ဗျာ။ ဒါဆိုရင်တော့ ကျနော်လဲ ကျနော်ကိုယ်တိုင်ရေးဖွဲ့ခဲ့ဖူးတဲ့ ကျော်စောကိတ္တိ သိပ်မရှိလှတဲ့ ကဗျာလေးတပုဒ် အကြောင်းကို ပြောပြချင်ပါတယ်။ ဒီလိုလေးစပါရစေ။

တလောလေးတင်က သတင်းတပုဒ်မှာ ထိုင်း-မြန်မာနယ်စပ် ဒုက္ခသည်စခန်းတွေဆီကအကြောင်း သဲ့သဲ့လေးကြားမိလိုက်ပါတယ်။ ဒုက္ခ သည်စခန်းတွေမှာ ကလေးမွေးဖွားနှုန်း အဆမတန်မြင့်တက်လာနေတဲ့အတွက် သက်ဆိုင်ရာတွေ ခေါင်းခဲနေကြတယ်ဆိုတဲ့အကြောင်းပါ။ ဒါကိုကြား တော့ ပြုံးမိပါတယ်။ ကျနော်က အဲဒီ့ဒုက္ခသည်စခန်းတွေထဲကတခုမှာ ရောက်နေတာဆိုတော့ ပြုံးမိသွားရတာ အဓိပ္ပာယ်ရှိရှိပါနော်။

ထိုင်း-မြန်မာနယ်စပ်တလျှောက်မှာက ဒုက္ခသည်စခန်းတွေ(၉)ခုတောင် ရှိတာကလား။ ကိုယ့်နိုင်ငံမှာဘယ်လိုမှ ဆက်လက်ရပ်တည်နိုင်ဖို့ မဖြစ်နိုင်ကြတော့တဲ့အဆုံး ကိုယ့်ရပ်ကိုယ်ရွာ ကိုယ့်လယ်ကိုယ်မြေ ကိုယ့်ဌာနေကိုစွန့် ကိုယ့်ဆွေမျိုးသားချင်း ကိုယ့်အဝန်းကိုယ့်အဝိုင်း ကိုယ့်ဝန်း ကျင်ကိုစွန့်ပြီး ကမ်းလွန်ငှက်တွေလို ရောက်လာကြရတဲ့ကျနော်တို့ညီအကိုမောင်နှမ တိုင်းရင်းသားလူမျိုးပေါင်းစုံ တသိန်းခွဲနှစ်သိန်းနီးပါးဟာ အဲဒီ့ ဒုက္ခသည်စခန်းတွေမှာ နိုင်ငံမဲ့ဘဝနဲ့နေနေကြရတယ်တဲ့။ အခု ဆယ်စုလောက်ရှိလာတဲ့အခါ သူတို့တွေက ပွားစည်းဝေဆာလာလိုက်ကြတဲ့ ကလေး ဦးရေဟာလဲ ငါးသောင်းလောက်တောင် ရှိတယ်တဲ့။ မနည်းမနောကြီးပါ လားနော်။ အရုပ်ဆိုးအကျည်းတန်တဲ့ အနိဋ္ဌာရုံနောက်ခံကားချပ်တွေကိုသာ မေ့ထားလိုက်ပြီး ကိုယ့်မြေကိုယ့်ရေမှာသာဆိုရင် ဘယ်လောက်များ ပျော်ဖို့နေဖို့ ကောင်းလိုက်မယ့် တိုင်းပြည်ဖြစ်မလဲပေါ့။

ခုတော့ ဒုက္ခသည်ဆိုတဲ့ နိုင်ငံမဲ့မိဘတွေက မွေး၊ မွေးလာတဲ့ ကလေးတွေ ကိုယ်စီမှာလဲ မွေးလာကတဲကိုက ဒုက္ခသည်ဆိုတဲ့လေဘယ်လ် လေးတွေက တွဲလျက်သားပါလာတာတွေကို တွေ့နေရတော့ ရင်မောစရာကောင်းလိုက်ပါဘိနဲ့။ “ မနုဿတ္တဘာဝေါ ဒုလ္လဘော ” မို့ လို့သာပေါ့နော်။ ဘာကြောင့်များဒီလောက်တောင် ရှင်မွေးလွန်း ခင်မွေးလွန်းတွေ ဖြစ်နေကြတာပါလဲလို့တွေးတော့ လွန်ခဲ့တဲ့ဆယ်နှစ်စွန်းများဆီက ဖိလစ်ပိုင် နိုင်ငံမှာ ဒီလိုပဲ ကလေးဖွားနှုန်းတွေမြင့်မားလာတဲ့အတွက် သက်ဆိုင်ရာကတွေကပြောတဲ့စကားကိုလဲ သဘာဝကျလှသမို့ မှတ်မိနေပါသေးတယ်။

အဲဒီတုန်းက ဖိလစ်ပိုင်မှာ ခုလောက် နိုင်ငံရေးစီးပွားရေး ပြည်တွင်းရေးက မတည်ငြိမ်ဘူးမို့လား။ သူတို့ပြောတာက ညညတွေမှာ လျပ်စစ်မီး က မရှိဘူးလေတဲ့။ မိသားစုတွေဟာ စောစောကြီးမိုးချုပ်၊ စောစောကြီးအိပ်ရာဝင်ကြရ။ အင်း ဒီလိုနဲ့ …။ ဒီလိုနဲ့ဆက်သာစဉ်းစားကြည့်ပါမိတ်ဆွေ။ လျပ်စစ်မီးမပါတဲ့ညတွေနဲ့ကျနော်တို့ဒုက္ခသည်များကရော ဖိလစ်ပင်းတွေလိုများ ပြောစရာစကား ရှိလေမလားပေါ့။

       ကျနော်ဖြင့် မြန်မာကဗျာလောကမှ လင်းလင်းတောက်တောက်ထင်ရှားလှတဲ့ ဆရာမကြည်အေးရဲ့ “ သစ္စာသစ် ” ဆိုတဲ့ ကဗျာလေးကိုတောင် အမှတ်ရမိသေးတာ။ လူ့ဘဝဆိုတာဖြစ်လာရပြီဆိုကတဲက ဒုက္ခတည်းဟူသောဝဲသြဃမှာ ပျော်ရွှင်သောသော ရယ်ကြမောကြ၊ လွမ်းလွမ်းဆွေးဆွေး ငိုကြကြွေးကြ၊ ဒီလိုသာကျင်လည်ကြရတာမှန်ပေမယ့် ဆရာမကတော့ အဲဒီ့ဒုက္ခသံသရာထဲမှာပဲ ချစ်မက်ခြင်း ပွားစည်းခြင်းတွေနဲ့ ပျော်ရွှင်ဝံ့စား မက် မောခြင်းကြီးစွာနေသွားချင်တယ်ဆိုပြီး ဖွဲ့ခဲ့တာပါ။ အဲဒီလို ဘဝကိုအာလျပြင်းပြဖက်တွယ်ပြီး ကြုံလာရမယ့်လောကဓံကိုလဲ ရဲရဲသာရင်ဆိုင်လိုတဲ့ စိတ်ကိုကပဲ လူသားရဲ့သတ္တိအဖြစ် တရားသစ်လို့ သူက မြင်ပါသတဲ့လေ။

          ကဗျာထဲက ဒီအပိုဒ်လေးကို မိတ်ဆွေကိုယ်တိုင်ဖတ်ပြီး ခံစားကြည့်ပါလား။

          “ ကျမချစ်မြဲ၊ သံသာဝံမှ

  ခွဲထွက်ချင်ဘူး၊ တပ်မက်ဦးမည်

  စိန်ခြူးကြယ်တန်း၊ လခြမ်းလ၀ိုင်း

  ညတိုင်းမြင်ချင်၊ ရွှေစင်နေ၀န်း

  ဆည်းဆာကွန်းမှ၊ ပေါ်ယွန်းစေ့စေ့

  နေ့တိုင်းတွေ့ချင် ” တဲ့။ 

ကဗျာမှာပါတဲ့ ဒီပါဒတွေကို ဝိတ္တာရသိပ်ပြီးချဲ့စရာမလိုဘူးထင်ပါတယ်နော်။ ဒါပေမဲ့  ကဗျာအပေါ် မိတ်ဆွေအနေနဲ့ ထိုးထိုးဝင်ဝင်လေးဖတ် ကြည့်မယ်ဆိုရင် ဆန်းကျယ်သစ်လွင်လှတဲ့အတွေးတမျိုးကို ကိုယ်တိုင်ရပြီး ပိုခံစားနိုင်တာပေါ့။ ပြီးတော့ ကမ္ဘာကျော်ပစ္စည်းမဲ့ ရုရှား စာရေးဆရာကြီး မဂ္ဂဇင်ဂေါ်ဂီပြောဖူးတဲ့ “ ဆာလောင်မွတ်သိပ်ခြင်းနဲ့ အချစ်စိတ်ဟာ လူ့ဘဝကိုဦးဆောင်တဲ့ အဓိပ္ပတိစိတ်ပဲ ” ဆိုတဲ့ စကားနဲ့လဲ နှိုင်းယှဉ်ကြည့် မြင်နိုင်ပါတယ်။

ထားပါတော့နော်။ အဲဒီ့ကဗျာကို ဆရာမနိဂုံးချုပ်သတ္တုချလိုက်ပုံအထိ သွားကြရအောင် ပါ။

“ထွေးပွေ့လင်သား၊ သမီးသားမြေး

  စကားနှစ်သက်၊ မိတ်ဆွေဖက်ဟု

  မက်မောဘ၀၊ တခဏလဲ

  အလှရှာဖွေ၊ အဖြေတွေ့သော်

  မွေ့ပျော်ငြိတွယ်၊ သေမျိုးနွယ်လဲ

  ရယ်ရွှင်ဝံ့စား၊ ငါလူသားဟု

  တရားထွန်းသစ်၊ သတ္တိဖြစ်၏ ” တဲ့။

မြင်နေရပါတယ်နော်။ ရခဲလှပါတယ်ဆိုတဲ့လူ့ဘဝကို ရောက်လာကြရတာကိုပဲ ကုသိုလ်ထူးကြရှာလို့လို့ ပြောတတ်ကြသလို လူဖြစ်ရခြင်းဟာ ဒုက္ခပါပဲလားလို့ စကားတွေအတိုင် အဖောက်မညီဖြစ်တတ်ကြတဲ့လောကကြီးမှာ ဆရာမကတော့ ဟောဒီ့ရခဲလှတဲ့ လူ့ဘဝခဏတာကို ချစ်ခြင်း၊ တွယ်ဖွဲ့ခြင်းကြီးစွာနဲ့ ချစ်သူခင်သူတွေ၊ သားတွေသမီးတွေ၊ မြေးတွေ တသီတသန်းကြီးနဲ့ မိတ်ဆွေပေါင်းသင်းတွေတလှေကြီးနဲ့ သေခြင်းမတိုင်မီထိ ပျော်ရွင်ဝံ့စား နေသွား ပျော်သွားချင်တယ်တဲ့။ သံသရာဝဋ်ဆင်းရဲက လွတ်မြောက်ပါရခြင်းအကျိုးငှာဆိုတဲ့ပြီး လောကကို သံဝေဂအမြင် ဓမ္မအမြင် မြင်ကြလေ့ရှိရာကနေ ဆရာမက ဖောက်ထွက်လက်ဆန့် ဟစ်ကြွေးပြလိုက်တာလေ။

ဒီကဗျာကို ဆရာမရေးခဲ့တာ အနှစ် (၄၀)တောင်နီးနေပါပြီ။ ဆရာမကိုယ်တိုင်လဲ ငယ်လှသေးသပေါ့။ များသောအားဖြင့်က ဘဝဆိုတာ ရလာကတဲက ဒုက္ခပါပဲလားဆိုတဲ့ ဘာသာတရားရဲ့အဆုံးအမအောက်မှာ နေခဲ့ကြရတာဆိုတော့ “ သစ္စာသစ် ” ကိုဖတ်ပြီး တချို့က တယ်လဲ မိုက်မဲ လှပါကလား ကလေးမရယ်လို့ အဲဒီ့အခါက ဆိုကောင်းဆိုခဲ့ကြမှာပါ။

ဒါဆိုရင်တော့ နဂိုကမှဒုက္ခသည်ပါဆိုတဲ့ ကျနော်တို့ညီအကိုမောင်နှမများရဲ့သစ္စာတွေ အကြိမ်ကြိမ်သစ်ကာ ပွားစည်းစွန့်စားကြပုံများကလဲ ဒီနေ့ခေတ်လူငယ်များစကားနဲ့ဆိုရင်တော့  ခပ်မိုက်မိုက်ရယ်မှ ခပ်မိုက်မိုက်။

          ဟုတ်ပါရဲ့။ ကျနော်တို့တွေ ဒုက္ခသည်စခန်းတွေမှာ နေစရာယာယီတဲကုပ်ကုပ်လေးတွေ ရပါတယ်။ စားစရာ လူတကိုယ်စာကာမိရုံ ဆန်၊ ဆီ၊ ဆား၊ ငရုတ်၊ ပဲ၊ ငပိ၊ သကြားနဲ့ များ များစားမိရင် ဗိုက်ကြီးတောင့် အစာမကြေ၊ နေရထိုင်ရခက်စေတဲ့ အာဟာရလို့အမည်ပေးထားတဲ့ ဂျုံလိုလို၊ ဆန်လိုလို၊ အာတာလွတ်လိုလို အမှုန့်တမျိုးကိုလဲ မှီဝဲကြရပါတယ်။ ဘယ်နေရာမှာမဆို ခြွင်းချက်ရှိမြဲအတိုင်း တချို့တချို့ကလွဲရင် အများစုကိုတော့ ယူအဲန်အိပ်ခ်ျစီအာရ်(ဒုက္ခသည်များဆိုင်ရာမဟာမင်းကြီးရုံး)ရဲ့အစီအစဉ်ကနေ ထောက်ပံ့တဲ့ စောစောကရိက္ခာတွေကသာ ကိုယ်စိတ်နှစ်ပါးနဲ့ရှင်သန် ခြင်းအဓိပ္ပာယ်ဆိုတာကို စောင့်ပါတယ်။ တချို့တချို့ သောမိသားစုများဆိုရင် ထိုင်းငါးပိလို့ခေါ်တဲ့ အတုံးအတစ်ကြီးလှတဲ့ငါးကြီးသားငါးပိကို ရေပေါ ပေါနဲ့ နာနာလေး ပြန်ဆေး၊ ဆီလေးစပ်စပ် ငရုတ်သီးတောင့်လေး ရောသမမွှေ၊ ရက်ရှည်ခံငပိကောင်ကျော်တပွဲအလယ်တည်လို့ ပဲဝါလေးဟင်း ရည်ကျဲသောက်ပြီး နေ့တပြန် ညတပြန်လွေးကျ။

နောက်တနေ့ဆန်းလာပြန်တော့လဲ အဲဒီငါးပိကိုပဲ နနွင်းနှမ်းချင်းထည့်ကျို၊ ငရုတ်သီး လှော်မှုန့်ထူထူထည့်ပြီး ပဲဟင်းရည်ကျဲလေး ရှူးရှဲရှူးရှဲ မြည်အောင်သောက်။ ဒီလိုစားကြနေကြရတာမျိုးနဲ့ တနေ့တနေ့ တတိယနိုင်ငံဆိုတာကိုမရောက်မချင်း ဇွဲခတ်ကြရတာပါ။ တချို့ နောင်ရေးကိုကြို တွေးထားကြတဲ့မိသားစုများကတော့ တတိယနိုင်ငံတခုခုရောက်ခါမှ စိတ်တိုင်းကျပစ်လိုက်မယ်ဆိုတဲ့တင်ကူးစိတ်နဲ့ ဟင်းချက်နည်းတထောင် စာအုပ် ကို ခေါင်းအုံးလုပ်အိပ်ပြီး အိပ်မက်ထဲ ဘိုးရင်းလေပျံကြီးစီး ရွက်လွှင့်လို့ပေါ့ဗျာ။ ကိုယ်နဲ့ဘယ်နိုင်ငံ နဖူးစာပါမလဲဆိုတာကလဲ ရှိသေးမဟုတ်လား။

       ဒီလိုပဲ ရှိနေရောက်နေတဲ့ဘ၀ကို ခင်တွယ်ကြ၊ ဖက်တွယ်ကြ မျှော်လင့်ကြတာ မိုက်ပြီလားဗျာ။ ဆရာမကြည်အေးရဲ့“ သစ္စာသစ် ” တွေ သစ်ပြီးရင်းသစ်လို့။ စခန်းတ၀ိုက်မှာတော့ တယောက်ပြီးတယောက် ပွားစည်းရင်း ပွားစည်းလို့။

   တနေ့မှာတော့ ကျနော်တို့ရဲ့မိသားစုများလိုပဲ သဘောထားရတဲ့ ညီလေးငယ်တို့မိသားစုမှာလဲ လျပ်စစ်မီးမပါတဲ့ညများစွာရဲ့ပုံပြင်လာအတိုင်း ပွားစည်းဝေဆာမယ့်နိမိတ်တွေပေါ်လာတာ ကျနော်သတိထားမိသွားပါတယ်။ ညီလေးငယ်ရဲ့အိမ်သူမလေးဟာ အရွယ်ကောင်းသူပီပီ ကိုယ်လေး လက်ဝန်ကြီးဆောင်ထားရရှာတဲ့ သူ့ပုံဟာ (အရပ်လေးကလဲ ပုရှာတော့) နိုကိုဥ ဖွံ့ဖွံ့ဖြိုးဖြိုးကြီးတလုံးလိုလို၊ အရည်တရွှမ်းရွှမ်းရှိလှတဲ့ ကြက်သွန်နီဥ ကြီးတလုံးလိုလိုနဲ့ ကြည့်ရတာ ရွှင်ပြစရာလဲကောင်း ရင်မောစရာလဲ ကောင်းလှပါတယ်။

  ရွှင်ပြစရာကောင်းတယ်ဆိုတာက အစာအာဟာရမပြည့်ဝတဲ့ဒီလိုနေရာမှာမိခင်လောင်း  တယောက် မွေးဖွားဖို့အရေးအပြင် မွေးလာမယ့်ကလေး ဖွံ့ဖြိုးမှုအတွက် လုံလောက်တဲ့အခြေအနေမှရှိပါ့မလားဆိုတာ မပူပင်ရလောက်အောင် စိတ်ချရတဲ့မြင်ကွင်းကြောင့်ပဲဖြစ်လို့ပါ။ ဒီ နိုကိုဥကြီးဟာ ပူပင် စရာမလိုလောက်အောင်ကို ရင်သပ်ရှုမောဖွယ်ကောင်းတဲ့သူ့ဂုဏ်အင်လက္ခဏာကို အပြည့်အစုံအခိုင်အမာပြသထားလို့ပါ။ (တကယ်ပဲ မွေးလာတဲ့ အခါ နည်းတဲ့ကလေးကြီးလားဗျာ။ ကမ္ဘာမြေကြီးကို လေးကီလိုတိုးပြီး ကျက်သရေဝေဖြိုးစေခဲ့တာပါ)။

အဲ ရင်မောစရာကောင်းတယ်ဆိုတာက..။

ဟုတ်ပါပီ၊ ဒီကလေးမွေးလာပြီဆိုတော့ ထုံးစံအတိုင်း ကိုယ်တွေသူတွေလိုပဲ နိုင်ငံမဲ့ မိဘနှစ်ပါးရဲ့သား နိုင်ငံမဲ့လူသားလေးတယောက် ဘယ် အခြေဘယ်အနေအထိ ဟောဒီ့ဒုက္ခသည်စခန်းထဲမှာ ကျောက်ချနေရအုံးမလဲပေါ့။ ကိုယ့်ယဉ်ကျေးမှုနဲ့ဝေးရာ၊ အတတ်ပညာစာပေ တို့နဲ့ဝေးရာ၊ မျှော် လင့်ခြင်းအဓိပ္ပာယ်ဆိုတာတွေနဲ့ဝေးရာ၊ ဟောဒီ့ဒုက္ခဘုံမှာ ဘယ်လောက်ကြာကြာနေရအုံးမလဲပေါ့။ ဒုက္ခသည်စခန်းဆိုတာ ကိုယ်ကလုပ်နိုင်အုံးတော့ အလုပ်လုပ်ခွင့်က မရှိ။ ကိုယ်က လုပ်နိုင်အုံးရှာနိုင်အုံးတော့ ရှာခွင့်ဖွေခွင့် မရှိ။

ဟုတ်ပီ။ သားကောင်းဖခင် ညီလေးငယ်ကရော သူ့သားလေးနောင်ရေးအတွက် ဘယ်လိုများတွေးပူနေမလဲ။ ဘယ်လိုမှနေခွင့်မသာတော့တဲ့ ကိုယ့်တိုင်းပြည်ကို ပြန်လည်လွမ်းဆွတ်၊ ငတ်မွတ်နေပြီလား။ သူ့အဖေသူ့အမေတွေဆီပြေးပြီး ဟောဒီမှာ အမေတို့မြေး အဖေတို့မြေးလေးဆိုပြီး ရင် ခွင်ထဲထိုးထည့် ပီတိတွေသဲ့ထုတ်ချင် နေလေမလား။

ဒီလိုနဲ့ တနံနက်ခင်းလင်းအားကြီးမှာတော့ သားလေးရဲ့အောင်အောင်မြင်မြင်အော် ဟစ်မြည်တမ်းလိုက်တဲ့ ချိုမြမြငိုသံလေးကို အိပ်ရာထဲက နေ ပီပီသသကြီးကြားလိုက်ရပါတယ်။

မင်းထွဋ်ခေါင်တဲ့။ တပို့တွဲလပြည့်နေ့ကြီးမှာမွေးလာတော့ ပြည့်ပြည့်ဖီးဖီး ဝဝတုတ်တုတ်ကြီး၊ ဖွေးဖွေးကိုလှုပ်လို့။ မိခင်နိုကိုဦးကြီးက သား ငယ်နိုကိုဥလေးကို ဖီးဖီးထွားထွားကြီး ပွားစည်းလိုက်တာလေ။ သူ့သားဖီးဖီးထွားထွားကြီးကိုကြည့်ပြီး အင်ဖက်မိုးကျိုးတိုးကျဲတဲ၊ ဝါး ခင်းဝါးကာ တဲကုပ်လေးကနေ ဟိုးအမေရိက ဟိုးဥရောပတွေဆီက ရဲတိုက်ကြီးတွေလိုလွင့်နေတဲ့တိုက်တာကြီးတွေမှာ တနေ့တော့ အမေတို့သွားပြီး နေကြရမှာ ပါသားလေးရဲ့လို့ အတွေးသီရင်း စာသားမဲ့တေးသွားနဲ့ အိုအိုအေးအေးလိုက် သားချော့တေးတပိုဒ်ကိုဆိုညည်းလို့။

အော်၊ သူ့အဖေခမျာမှာလဲ ခေါင်းပေါ်ကနေ မီးခိုးတွေများ အူပြီးထွက်လာတော့မလား ထင်ရလောက်အောင် သူ့သားလေးအနာဂတ်အတွက် အတွေးစဉ် အမျှင်တန်းလို့။

ဒီမြင်ကွင်းကိုပြေးမြင်ပြီး ကျနော်လဲ ဟောဒီကဗျာလေးကို ရေးဖြစ်ပါတော့တယ်။

“ ကမ္ဘာမြေရဲ့သီချင်းမြစ်တစင်း”

၁။

၁.၂.၂၀၀၇ နေ့။

မမွေးမီကတည်းက

နှင်းခါးတွေအရိုက်ခံရတဲ့အဖြစ်နဲ့

သားလေးဟာ

ဒုက္ခသည်စာရင်းသစ်ဝင်သွားတယ်

ဒါ .. ကမ္ဘာဆန်သွားတာပေါ့ကလေးရယ်။

လေးကီလိုနီးပါး

ကျက်သရေတိုးပွားလာတဲ့

မဟာပထ၀ီကမ္ဘာမြေဟာ

သားလေးအတွက်

အာဟာရမှုန့်ကိုဖျော်ပြီ။

၂။

လောကမလင်းမီ

ထစ်ချုန်းငိုကြွေးလိုက်တဲ့

မြင့်မိုရ်တောင်ကြားက

ဓားတစင်းရဲ့တေး

မင်းထွဋ်ခေါင်လေးရေ

မင်းမေမေရဲ့တေးသံမှာ

သမုဒ္ဒရာခုနှစ်စင်းအနှံ့

ပဟေဠိတွေဆန့်လို

ရွက်ဖျဉ်ဟောင်းကိုထိုးဖျက်

ရဲတိုက်ပေါ်ကိုတက်လို့

မင်းဖေဖေက

သင်္ဘောတစင်းဆိုရင်တော့

ခေါင်းတိုင်မှာ

မီးခိုးတလူလူနဲ့ပေါ့လေ။ ။

ခင်လွန်း

၂၈.ဇန်နဝါရီ၊ ၂၀၀၉

ည- ၉း၁၅ နာရီ

စာကြွင်း- မင်းထွဋ်ခေါင်လေးက ယခုအခါ အမေရိကန်ပြည်ထောင်စု အာကင်ဆောပြည်နယ်မှာ ရောက်နေပြီဖြစ်ပါတယ်။