ချစ်သမီးသို့ … ရေဆန်

.

သမီးရေ …
ဂန္ထ၀င်ခရီးမှာ
နေ့ခင်းကြောင်တောင်
နေရောင်ခြည်အောက်
တောင်မြောက်ဘယ်မှာ မသိပါ
ရပ်နေသူများလည်း ရှိပါသည်။

ညဉ့်နက်သန်းခေါင်
လမ်းစမှောင်လည်း
တောင် မြောက်သေချာသိနေပါ
လိုရာသွားနေသူလည်း သိပါသည်။

လေပြင်းအတိုက်
လှိုင်းအရိုက်မှာ
ငိုရှိုက်အော်မြည်
ဆောက်တည်ရာမဲ့
လွင့်ပျက်နေသူတွေလည်း ရှိပါသည်။

မုန်တိုင်းက ထန်
လှိုင်းက ထန်လည်း
လေဆန် ရေကြမ်း ခရီးလမ်းကို
ဖြတ်သန်းနေသူတွေလည်း ရှိပါသည်။

သမီးရေ …
စေတနာနှင့် 
အသိ သတိနှင့် 
သီလ ဝီရိယနှင့် 
ပညာ သစ္စာနှင့် 
သမာဓိ သတ္တိနှင့် 
စွန့်လွှတ်မှု အရင်းပြုခရီးနှင်
ဂန္ထ၀င်ရက်မြတ် ရဲရဲဖြတ်လော့ သမီး …..။

ရေဆန်

(စကားချပ်)
“ ရေဆန် ” ဆိုတဲ့ ကလောင်အမည်နဲ့
ဖဒိုမန်းရှာရေးသားခဲ့တဲ့ ကဗျာလေးတပုဒ်ပါ။
ကျောင်းသားတပ်မတော်ကထုတ်ဝေတဲ့
ဒေါင်းအိုးဝေ စာစောင်မှာ ဖော်ပြခဲ့ဖူးပါတယ်။
ဒီကဗျာလေးကို လှမ်းပို့ပေးတဲ့ ဆရာမောင်လွမ်းဏီကို
အထူးပဲ ကျေးဇူးတင်ရှိပါတယ်။

လွတ်လပ်လှိုင်းမဂ္ဂဇင်း